Universiteti Bujqësor i Tiranës mbajti një sesion informues kushtuar programit të granteve kërkimore të financuara nga Albanian-American Development Foundation (AADF) në bashkëpunim me Butrint Management Foundation (BMF).
Aktiviteti synoi të informojë stafin akademik dhe kërkimor të UBT-së mbi mundësitë e financimit, kriteret e aplikimit dhe fushat prioritare të mbështetjes, duke nxitur përfshirjen e studiuesve të universitetit në projekte kërkimore me ndikim kombëtar dhe ndërkombëtar.
Përfaqësuesit e AADF prezantuan strukturën e programit, kushtet e aplikimit, afatet dhe procedurat, si edhe zhvilluan një diskutim të hapur me pjesëmarrësit për të sqaruar çështje që lidhen me përgatitjen e projekt-propozimeve.
Programi parashikon një fond prej 2.5 milionë lekësh për ekipet shqiptare, ndërsa bashkëpunëtorët nga diaspora financohen përmes një buxheti të veçantë. Afati i fundit për dorëzimin e aplikimeve është 15 gusht 2026, ndërsa projektet do të kenë një periudhë zbatimi prej një viti.
Gjatë prezantimit u evidentua se UBT ka potencial të lartë për të aplikuar në disa prej fushave prioritare të programit, si hidrologjia dhe gjeologjia, bujqësia, menaxhimi i trashëgimisë kulturore dhe menaxhimi i vizitorëve.
Një vëmendje e veçantë iu kushtua prioriteteve kërkimore të identifikuara për zonën e Butrintit, ku përfshihen studimet mbi ndryshimet klimatike dhe ndikimin e tyre në mjedis, monitorimi i indikatorëve biologjikë në Liqenin e Butrintit, studimet mbi likenet në monumentet kulturore, si edhe projektet që përdorin teknologjitë GIS për analizën dhe menaxhimin e të dhënave.
Në fushën e bujqësisë u theksua rëndësia e zhvillimit të projekteve që adresojnë monitorimin, parandalimin dhe kontrollin e insektit Planococcus citri (mielli i agrumeve), një problematikë që ka prekur zonën e Konispolit gjatë viteve të fundit dhe që konsiderohet një nga prioritetet e kësaj thirrjeje.
Po ashtu, në fushat e menaxhimit të trashëgimisë kulturore dhe menaxhimit të vizitorëve u rekomandua angazhimi i Departamentit të Turizmit të UBT-së, si edhe bashkëpunimi me institucione të tjera akademike për zhvillimin e projekteve të përbashkëta.
Linku i aplikimit dhe informacionit: https://www.iie.org/programs/research-expertise-from-the-academic-diaspora/apply/for-albanian-resident-scholars
