Me synimin për të forcuar lidhjet akademike dhe për të nxitur bashkëpunimin kërkimor ndërinstitucional, Universiteti Bujqësor i Tiranës dhe Universiteti i Mjekësisë, Tiranë nënshkruan këtë të enjte një marrëveshje të re bashkëpunimi.
Dokumenti u firmos nga Rektori i UBT-së, Prof. Dr. Fatbardh Sallaku, dhe Rektori i UMT-së, Prof. Dr. Xheladin Draçini, në një ceremoni zyrtare që shënoi fillimin e një partneriteti afatgjatë mes dy institucioneve kryesore të arsimit të lartë në vend.
Marrëveshja përcakton si prioritete kryesore:
-Zhvillimin e projekteve të përbashkëta kërkimore dhe shkencore në fusha me interes të ndërsjellë;
-Krijimin e programeve të përbashkëta të studimeve, përfshirë bashkëudhëheqjen në doktoratura;
-Mbështetjen dhe promovimin e studiuesve të rinj, duke ofruar mundësi për formim dhe angazhim në kërkimin shkencor;
-Shkëmbimin e stafit akademik dhe studentëve, për leksione, seminare dhe praktika studimore;
-Përdorimin e përbashkët të burimeve akademike e kërkimore, si bibliotekat, laboratorët dhe botimet shkencore.
Kjo nismë do të shërbejë si bazë për organizimin e konferencave, simpoziumeve dhe aktiviteteve të përbashkëta që forcojnë rolin e kërkimit shkencor në zhvillimin e dijes dhe inovacionit.
Nëpërmjet këtij bashkëpunimi, UBT dhe UMT synojnë të kontribuojnë në rritjen e cilësisë së arsimit të lartë dhe zhvillimin e kapaciteteve shkencore të vendit, duke ndërtuar ura bashkëpunimi që i shërbejnë progresit të përbashkët akademik dhe shoqëror.
