Designed and built with care, filled with creative elements

Top
Image Alt

Themeluesi I Fakultetit te Bioteknologjise se Ushqimit ne Shqiperi

Prof. Dr. Vlash MARA

Me datën 26 Dhjetor 2021, pas një sëmundjeje te rëndë, ndërroi jetë Prof. Dr. Vlash Mara. Largimi i tij i parakohshem është një humbje e madhe për familjen, të afërmit dhe ne kolegët e tij.

Prof. Mara, si nje nga kimistët më të mirë të vendit tonë, ka kontribuar prej 45 vjetësh në edukimin e dhjetra brezavë të studentëve, asistentë, doktorantë në Universitetin Bujqësor të Tiranës dhe trojet shqiptare të Kosovës dhe Maqedonisë së Veriut.

Prof. Vlash Mara ka përfunduar studimet universitare në 1967 pranë Fakultetit të Shkencave të Natyrës, Universiteti i Tiranës, Dega e Kimisë Industriale.  Në vitet 1975-1989 ka drejtuar Katedrën e Kimisë, Fakulteti i Agronomisë, UBT, ku dallohet për kontributin e çmuar në nivelin shkencor të programeve mësimore në lëndët e Kimisë Organike, Biokimisë së Bimëve, Kimia e Përgjithëshme dhe Inorganike, Shkenca e të Ushqyerit të Njeriut, leksioneve pasuniversitare, në mësimdhënie dhe kërkim shkencor në fushën e përmiresimit gjenetik të grurit dhe misrit, hartimit të teksteve mësimore, botimeve dhe dhjetëra udhëheqjeve shkencore në nivele të ndryshme.

Prof. Vlashi ishte një njeri që jo vetëm fliste dhe transmetonte njohuri e koncepte shkencore, por Ai njëkohësisht ishte një njeri shumë sistematik dhe që shkruante. Frut i kësaj punë të gjatë dhe krijuese, janë disa qindra artikuj shkencorë dhe divulgativë, janë kumtesat e shumta të mbajtura në konferenca shkencore të realizuara në Shqipëri apo jashtë vendit, janë metodikat e hartuara, janë udhëheqjet e tij të shumta të kërkuesve të rinj: duke filluar nga temat e diplomës universitare e deri tek ato pas universitare: Kandidat i Shkencave (që ishte më parë) dhe Master e Doktoraturë.

Duke qënë vizionar për zhvillimet e të ardhmes dhe studjues skrupuloz dhe i pashembullt, Prof. Mara ideoi dhe realizoi ngritjen e programeve të studimit në fushën e Teknologjisë dhe Bioteknologjisë Ushqimore, si dhe drejtimit Vreshtari-Enologji, në nivelin Bachelor, Master Shkencor, Master Profesional si dhe studime të Doktoraturës, duke themeluar kështu në vitin 2007 Fakultetin e Bioteknologjisë dhe Ushqimit – i vetmi i këtij lloji në vendin tonë, duke drejtuar si Dekani i parë i këtij Fakulteti në periudhën 2007-2012.

Prof. Vlashi ishte krenari për Universitetin Bujqësor të Tiranës. Model i profesorit të aftë, shkencëtarit të përkushtuar, kolegut fjalëpak dhe mikut të mirë të të gjithëve.

Prof. Vlash Mara ka iniciuar dhe ka realizuar një sërë kontaktesh me universitete të njohura në Europë. Një ndër më të spikaturit është bashkëpunimi i tij i ngushtë me një ndër fakultetet më të mira të Gjermanisë, Fakultetin e Teknologjisë Ushqimore të Universitetit të Hohenheimit. Në këtë bashkëpunim, përgjatë rreth dy dekadave, me këtë Universitet, Profesor Vlash Mara, ka bërë një përfaqësim dinjitoz si profesorat i Universitetit Bujqësor, jo vetëm për nga niveli akademik, por, mbi të gjitha, për përkushtimin e tij të jashtëzakonshëm, për ti sjellë mbështetje sa më të madhe të mundëshme Universitetit tonë nga ky universitet elitar gjerman në këtë fushë. Sa herë ishte Profesor Vlashi në Institutin für Lebensmitteltechnlogie te Universitetit të Hohenheimit, pritej me kënaqësi nga profesorët e këtij fakulteti me një gatishmëri të jashtëzakonshme për të ndihmuar UBT. Frut i këtij bashkëpunimi është edhe ngritja e Departamentit të Teknologjisë Agroushqimore në UBT, në vitin 1994, dhe, mbi bazën e tij, e Fakultetit të Bioteknologjisë dhe Ushqimit në UBT, në vitin 2008, i vetmi fakultet i tillë në vendin tonë.

Universiteti Bujqësor i Tiranës, me vendim të Senatit Akademik, datë 19/10/2021, i ka akorduar Prof. Dr. Vlash MARA, Titullin “Profesor Emeritus”,  me motivacionin: “Si një vlerësim për kontributin e veçantë dhe veprimtarinë e shquar në mësimdhënie dhe në ngritjen e kërkimit shkencor në fushën e Shkencave të Teknologjisë Ushqimore dhe krijimin e Fakultetit të Bioteknologjisë dhe Ushqimit në Universitetin Bujqësor të Tiranës”.

Prof. Vlashi përcillte tek studentët dhe kolegët jo vetëm vlera të larta shkencore dhe profesionale, por dhe kulturë shumë dimensionale, humanizëm, nivel të lartë qytetarie dhe shembullin më të përkryer të njeriut modest dhe fisnik.

Prof. Vlash Mara do ti mungojë të gjithëve! Vepra dhe puna e tij do të kujtohen ndër breza dhe do të shërbejë si një gjurmë e ndritur mbi të cilën do të ecë me tej zhvillimi i shkencave të ushqimit, të teknologjisë dhe bioteknologjisë ushqimore.

Universiteti Bujqësor i Tiranës i shpreh ngushëllimet e sinqerta dhe të ndjera familjes, miqve, kolegëve dhe ishstudentëve të Profesor Vlash Mara!

Lamtumirë i dashur Profesor dhe mik i çmuar, Vlash Mara!